بصمة إنسانية في طب الأسنان

 



بصمة إنسانية في طب الأسنان.. حوار مع د. عمار عوض الكريم

إعداد: محمد الجاك

صحيفة صرير الأقلام



---


س: دكتور، دعنا نبدأ من البدايات.. وين كانت نشأتك، وكيف بدأت رحلتك مع طب الأسنان؟

ج: أنا د. عمار عوض الكريم إبراهيم، أصول الأسرة من منطقة الحلاوين، بالتحديد من قرى التكلة جبارة، شرفت الحلاوين، وطيبة الشيخ القرشي. ولدت في المملكة العربية السعودية، ودرست هناك حتى الصف الرابع أساس، ثم عدت إلى السودان وأكملت دراستي في قرية طيبة الشيخ القرشي، في مدرسة الشهيد بنين. الثانوية درستها في طيبة النموذجية، وبعدها انتقلنا إلى مدينة الحصاحيصا. التحقت بجامعة الجزيرة ودرست طب الأسنان في مدينة ود مدني.


س: هل كنت بتحلم من الصغر تكون طبيب أسنان؟ أم جاءت الصدفة؟

ج: في الحقيقة، ما كنت بحلم من البداية أكون طبيب أسنان. الفكرة بدأت تتكون في المرحلة الثانوية، خاصة أن والدي طبيب أسنان، فكان عندي معرفة سطحية بالمجال. مع مرور الوقت، أحببت المجال، والحمد لله وبتوفيق ربنا قدرت أدخل التخصص اللي كنت قاصده عن قناعة.


س: شنو أكتر حالة إنسانية علقت في بالك خلال مسيرتك المهنية؟

ج: في حالات كثيرة، لكن واحدة ما بنساها أبداً. جاتني مريضة وكان عرسها قريب، وكانت عندها مشاكل كثيرة في أسنانها مأثرة على شكلها ونفسيتها، حسب كلامها. كانت محتاجة علاج مكثف في وقت قصير، وتكلفة العلاج كانت آخر همها. الحمد لله، اشتغلنا بكل جهد وخلصنا العلاج قبل زواجها، ولما شافت النتيجة ما قدرت تمسك دموعها. اللحظات دي بتخليك تحس بقيمة عملك، وأنك كنت سبب في سعادة إنسان.


س: بينك وبين المريض، علاقة مليانة ثقة وخوف أحيانًا.. كيف بتتعامل مع مرضى بيجوا وهم مرعوبين من الكرسي؟

ج: فعلاً أغلب المرضى بيجوا بخوف، خاصة من كرسي الأسنان. أهم حاجة بنعملها هي إننا نطمن المريض ونشرح ليه الخطوات ببساطة، وبنحاول نخرجو من جو التوتر بالدردشة والتعامل الهادئ. الحالة النفسية بتفرق شديد في استجابة المريض للعلاج.


س: لو جينا للأسئلة اليومية.. كتير ناس بتسأل: كم مرة لازم نفرّش أسنانا؟ وهل الفرشة العادية كافية؟

ج: أقل حاجة لازم نفرّش مرتين في اليوم، وخصوصًا قبل النوم لأنه أهم من الصباح. الفرش فيها أنواع: الخشنة، المتوسطة، والناعمة. الأفضل نستخدم المتوسطة لأنها مناسبة للأسنان واللثة معًا.


س: في اعتقادك، شنو أكبر خطأ بيعملوهو الناس في العناية بأسنانهم؟

ج: أكبر خطأ إنو الناس بتشوف تسوس بسيط وتهملو لمجرد إنه ما بيوجع. التسوس ممكن يتطور بصمت لحد ما تفقد السن. دا خطأ شائع وبنحاول نوعي الناس بخطورته.


س: التبييض بقى موضة عند الشباب.. هل هو آمن فعلاً؟

ج: التبييض آمن إذا اتعمل بطريقة صحيحة وللأشخاص المناسبين، خصوصًا اللي عندهم تصبغات أو بقع على الأسنان. الناس لازم تفرق بين التبييض والقشور الخزفية (الفينير)، اللي بنشوفها عند المشاهير وهي بتدي شكل ناصع للأسنان لكنها إجراء تجميلي مختلف تمامًا.


س: بالنسبة للأطفال.. متى لازم يزوروا طبيب الأسنان لأول مرة؟ وكيف نخليهم ما يخافوا؟

ج: من الأفضل يبدأ الطفل يزور الطبيب من عمر 4 إلى 5 سنوات، لأنو من سن 6 بتبدأ الأسنان اللبنية تسقط وتظهر الأسنان الدائمة. المتابعة ضرورية خلال المرحلة دي حتى عمر 13 سنة. والمهم جداً إنو الأهل ما يخوفوا الطفل قبل الزيارة، ما يقولوا ليهو "حيدوك حقنة" مثلاً. لازم يخلوا الموضوع بسيط، ونحن بدورنا بنتعامل مع الطفل حسب درجة خوفه بأساليب مدروسة.


س: في ظل الظروف الاقتصادية الحالية، هل بتشوف أنو الناس بقت تهمل زيارات العيادة؟

ج: للأسف نعم، الوضع الاقتصادي أثر سلبًا على صحة الأسنان. كثير من الناس بيأجلوا الزيارة إلا بعد ما يظهر الألم، ودي مشكلة. لما تقارن بين مجتمعات وضعها الاقتصادي جيد، بتلقى صحتهم الفموية أفضل بشكل ملحوظ.


س: بعيدًا من الطب.. شنو بتعمل لما تكون برا العيادة؟ عندك هوايات مثلاً؟

ج: خارج العيادة، بحاول أخصص وقت للأسرة، الأصدقاء، والزيارات الاجتماعية. من هواياتي كرة القدم، كنت بلعب زمان لكن هسي بس بتفرج. كمان بحب الزراعة، ودي زي ما بنقول موروث من جدودنا وأبهاتنا، وبتخليني أغير جو. وبرضو عندي شغف بقراءة الشعر واللغة العربية، بالإضافة لمتابعة التطورات في مجال طب الأسنان بشكل دائم.


س: لو ما كنت طبيب أسنان، كنت بتتخيل نفسك في أي مهنة؟

ج: صراحة، ما فكرت في بديل غير طب الأسنان. دا المجال اللي بحبّو وبلقى نفسي فيهو، لكن لو اضطررت أختار مجال تاني، ممكن يكون الطب العام، تحديدًا الجراحة.


س: أخيرًا، شنو النصيحة الذهبية البتقولها دايمًا لأي شخص داير يحافظ على صحة أسنانه؟

ج: أهم حاجة، أول ما تلاحظ أي مشكلة في أسنانك، لا تتأخر في زيارة الطبيب. كل ما بدّرت بالمراجعة، العلاج حيكون أسهل وأرخص، وفرصة الحفاظ على السن بتكون أكبر. وبرغم تطور تقنيات التركيبات والزراعة، ما في شيء بيعوّض الأسنان الطبيعية. خلي صحة فمك من أولوياتك، وابتعد عن العادات السيئة زي التبغ والسجائر. جسمك بيعتمد على أكلك، وأكلك بيعتمد على أسنانك.


تعليقات