حوار صحفي مع الممثل الكوميدي مطر
إعداد: محمد الجاك
في وقت أصبح فيه الضحك عملة نادرة وسط الضغوط اليومية، يبرز اسم "مطر" كأحد أبرز الأصوات الكوميدية السودانية الشابة، التي نجحت في انتزاع الابتسامة من جمهور واسع عبر منصات التواصل الاجتماعي. حوارنا معه كشف جوانب من رحلته، أسلوبه، وتحدياته في عالم التمثيل والكوميديا.
س: بداية، كيف بدأت رحلتك في عالم الكوميديا؟
الرحلة بدأت بي فيديو لي طلاب الشهادة السودانية بطريقة ساخرة كده، ومنها طوالي عملتا صفحة. ما كنت بمثل، كنت بردم، اشتغلت فترة كده ولقيت نفسي في التمثيل أحسن، فاشتغلت على الموضوع.
س: ما الذي جذبك لهذا النوع من الفن تحديدًا؟
والله أنا أصلاً بي الفطرة كده، فلقيت نفسي في حاجة أنا بحبها وما بجهد فيها كتير، فقلت أطوّرها وأحاول أجذب المشاهد بحاجات من عندي.
س: من هم أبرز الممثلين الذين أثروا فيك؟
في البداية ما كان في زول محدد، لكن الممثلين السودانيين كتار والله. الفاضل سعيد - رحمه الله -، جمال حسن سعيد، والقائمة تطول.
س: كيف تصف أسلوبك الكوميدي؟
ممكن تقول ارتجالي مجتمعي. يعني بحكي الحاصل في المجتمع بطريقة كوميدية. ما بكتب سيناريو، بفتح الكاميرا وببدأ أصور، وبنزل المشاكل بصورة حركية فيها توعية ونصائح.
س: البعض يقلل من قيمة الكوميديا ويعتبرها "للتسلية فقط".. شنو رأيك؟
والله في ناس بقولوا "دي ما شغلة! إنتا قايل نفسك حاجة؟ إنتا بتضحك فينا بس!" ولو شرحت ليه لي بكرة، حيكون مصر على رأيه. لكن كل زول عندو دور، والفكاهة دي دور مهم، بتغير المود وبتساهم في توازن المجتمع.
س: هل واجهت مواقف صعبة في مشوارك؟
لحدي أسّي، الحمد لله، ما واجهت أي شي، وإن شاء الله ما ألقى صعوبات قدّام.
س: هل في حدود للمزاح في رأيك؟
أكيد. لازم الزول يعرف متين يضحك ومتين يكون جاد. ما كل حاجة ضحك، ولو اختلطت الأمور حتبقى مجرد مهرّج ساكت. مهم الناس تعرف تفرز، وتفهم الرسائل ورا الضحك.
س: كيف بتتعامل مع النقد؟
بحبو! أعمل شنو يعني! بتقبلو بصدر رحب، ومهما كان النقد حتلقى مني الرد السمح. في النهاية دي وجهة نظرك، وأنا مدام دخلت عالم الميديا، لازم أكون واسع البال. مرات الزول بينتقد عشان يغيظك، لكن لو سمع ردود كويسة، بيبدأ يحترمك ويغير رأيه.
س: شنو أكتر عمل قريب لقلبك؟
لو قصدك عمل شخصي، أنا يادوب في العتبة الأولى. لكن في فيديو اسمه "لمن ترجع بيتكم الفي الخرطوم"، دا من أجمل الفيديوهات عندي، لأني كنت طبيعي وتلقائي فيه، وطلع بصورة جميلة.
س: أخيرًا، شنو رسالتك لجمهورك؟
أولاً، أنا بحب جمهوري شديد، بحسهم أسرتي التانية. برد على تعليقاتهم، وبنتونس معاهم في الخاص. بعد توفيق ربنا، إنتو السبب في إني وصلت للمكان دا، وإن شاء الله ما أخذلكم. الجديد؟ مفاجأة، وحاجة تشبهكم يا جميلين.

تعليقات
إرسال تعليق